ഷാർജ: യുഎഇയിൽ അനധികൃതമായി താമസിക്കുന്ന പ്രവാസികളെ നാട്ടിലെത്തിക്കാൻ അവസരമൊരുക്കും. പൊതുമാപ്പിൽ നാട്ടിലേക്ക് മടങ്ങിയവർക്ക് യുഎഇയിലേക്ക് നിയമവിധേയമായി തിരിച്ചെത്താനും അവസരം.UAEICP അധികൃതർ ഷാർജ ഇന്ത്യൻ അസോസിയേഷൻ പ്രസിഡൻറ് നിസാർ തളങ്കരയുമായി കൂടിക്കാഴ്ച നടത്തി.
സാധുതയുള്ള വിസയിൽ നിയമപരമായി രാജ്യത്ത് തുടരാൻ യുഎഇ സർക്കാർ എല്ലാവരെയും അനുവദിക്കും. വരും വർഷങ്ങളിൽ യുഎഇയിൽ പുതിയ തൊഴിലവസരങ്ങൾക്കുള്ള സാധ്യതകളുണ്ടാവും.
കാലഹരണപ്പെട്ട സന്ദർശന വിസയോ താമസ വിസയോ ഉപയോഗിച്ച് യുഎഇയിൽ അനധികൃതമായി താമസിക്കുന്ന ആളുകൾക്ക് സെപ്തംബർ, ഒക്ടോബർ മാസങ്ങളിൽ പിഴയില്ലാതെ സ്വന്തം നാട്ടിലേക്ക് മടങ്ങാൻ അവസരം ലഭിക്കും. നാട്ടിലേക്ക് മടങ്ങുന്ന എല്ലാവരെയും അവർ ഉദ്ദേശിക്കുന്ന സമയത്ത് നിയമപരമായി യുഎഇയിലേക്ക് മടങ്ങാനും അനുവദിക്കും.
അപേക്ഷാ ഫോം ശേഖരിക്കാനും അപേക്ഷകൾ സമർപ്പിക്കാനും പൊതുജനങ്ങൾക്ക് 1 സെപ്റ്റംബർ 2024 മുതൽ എമിഗ്രേഷൻ അംഗീകൃത ടൈപ്പിംഗ് സെൻററുകളെ സമീപിക്കാം.
സിവിൽ, തൊഴിൽ, വാണിജ്യം തുടങ്ങിയ ഏതെങ്കിലും തരത്തിലുള്ള കോടതി കേസുകളിൽ ഏർപ്പെട്ടിരിക്കുന്ന ആളുകൾ ഈ അവസരം പ്രയോജനപ്പെടുത്തുന്നതിന് ബന്ധപ്പെട്ട വകുപ്പുമായി ബന്ധപ്പെട്ട കേസുകൾ തീർപ്പാക്കേണ്ടതുണ്ട്.
2024 സെപ്തംബർ ആദ്യവാരത്തിൽ ഇന്ത്യൻ അസോസിയേഷൻ ഷാർജ യുഎഇ സർക്കാർ ഉദ്യോഗസ്ഥരുമായും ഇന്ത്യൻ കോൺസുലേറ്റ് ഉദ്യോഗസ്ഥരുമായും ഒത്തുചേരൽ ഏകോപിപ്പിക്കും. ഇക്കാര്യത്തിൽ പൊതുജനങ്ങൾക്ക് ഇന്ത്യൻ അസോസിയേഷൻ പൂർണ്ണ പിന്തുണയും മാർഗനിർദേശവും നൽകും.
