ദുബൈ: ഈ വര്‍ഷഷത്തെ ബലിപെരുന്നാളിന് ദുബൈ മതകാര്യ വകുപ്പിന്റെ സഹകരണത്തോടുകൂടി യു.എ.ഇ. ഇന്ത്യന്‍ ഇസ്ലാഹി സെന്ററും അല്‍മനാര്‍ ഇസ്ലാമിക് സെന്ററും സംയുക്തമായി മലയാളം ഉറുദു ഭാഷളിലായി രണ്ടെണ്ണം വീതവും, ഇംഗ്ലീഷ്, തമിഴ് ഭാഷകളിലായി ഓരോന്നും ഉള്‍പ്പെടെ മൊത്തം ആറു ഈദ് ഗാഹുകള്‍ നടത്തുമെന്ന് ഇന്ത്യന്‍ ഇസ്ലാഹി സെന്റര്‍ ഭാരവാഹികള്‍ അറിയിച്ചു.
അല്‍ഖൂസ് അല്‍മനാര്‍ ഇസ്ലാമിക് സെന്ററിലെ ഈദ്ഗാഹിന് മൗലവി മന്‍സൂര്‍ മദീനിയും ഖിസൈസ് ലുലു ഹൈപ്പര്‍മാര്‍ക്കറ്റിനു സമീപമുള്ള ടാര്‍ജറ്റ് ഫുട്‌ബോള്‍ ഗ്രൗണ്ടില്‍ നടക്കുന്ന ഈദ്ഗാഹിന് മൗലവി ഹുസൈന്‍ കക്കാടും നേതൃത്വം നല്‍കും. ഞായറാഴ്ച്ച രാവിലെ 5:45 ന് ഈദ് നമസ്‌കാരവും തുടര്‍ന്ന് മലയാളത്തില്‍ ഈദ് പ്രഭാഷണവും ഉണ്ടായിരിക്കും.
ഇതോടൊപ്പം ഉറുദു ഭാഷയില്‍ ഖിസൈസ് സോനാപൂരില്‍ നടക്കുന്ന ഈദ് ഗാഹിന് ഹാഫിസ് നഈമുള്ളാഹ് സനാബുലിയും ജബല്‍അലി ഇന്‍ടസ്ട്രീയല്‍ ഏരിയയില്‍ നടക്കുന്ന ഈദ് ഗാഹില്‍ സലീമുല്ലാഹ് ബിന്‍ നൂറുല്ലയും ബര്‍ഷയില്‍ എന്‍.ജി.എസ് സ്‌കൂളില്‍ നടക്കുന്ന ഇംഗ്ലീഷ് ഭാഷയിലെ ഈദ്ഗാഹിന് അയാസ് ഹൗസിയും ഖിസൈസ് ക്രെസന്റ് ഇംഗ്ലീഷ് സ്‌കൂളില്‍ തമിഴ് ഭാഷയില്‍ നടക്കുന്ന ഈദ് ഗാഹിന് ശൈഖ് മുഹമ്മദ് ശെരീഫ് നേതൃത്വം നല്‍കും.
എല്ലാവരും വുദുവെടുത്ത് മുസല്ലയുമായി വരണം. സ്ത്രീകള്‍ക്ക് പ്രത്യേക സ്ഥല സൗകര്യം ഏര്‍പ്പെടുത്തിയിട്ടുണ്ട്, കൂടുതല്‍ വിവരങ്ങള്‍ക്ക് ബന്ധപ്പെടേണ്ട നമ്പര്‍ ഖിസൈസ് 04 2633391, അല്‍ഖൂസ് 0505242429, അല്‍ബറാഹ 0556525733
നാലു പതിറ്റാണ്ടായി യു.എ.ഇ.യുടെ പൊതുമണ്ഡലത്തില്‍ നിസ്വാര്‍ത്ഥമായി പ്രവര്‍ത്തിക്കുന്ന യു.എ.ഇ. ഇന്ത്യന്‍ ഇസ്ലാഹി സെന്ററിന് നല്‍കിവരുന്ന അംഗീകാരങ്ങള്‍ക്ക് ദുബൈ ഭരണാധികാരി ശൈഖ് മുഹമ്മദ് ബിന്‍ റാഷിദ് അല്‍മക്തൂമിനും ദുബൈ മതകാര്യ വകുപ്പ് മേധാവി അഹമദ് ദര്‍വീശ് അല്‍മുഹൈരി, ഡയരക്ടര്‍ ഡോ. ഉമര്‍ മുഹമ്മദ് അല്‍കാത്തിബ് തുടങ്ങിയവര്‍ക്കും ഹൃദയം നിറഞ്ഞ നന്ദി അറിയിക്കുന്നതായി ഭാരവാഹികള്‍ അറിയിച്ചു.
