അബൂദബി: അബൂദബിക്കാർക്കായി ഒരു സന്തോഷവാർത്ത, പൊതുജനങ്ങൾക്ക് കൂടുതൽ സൗകര്യപ്രദവും ആരോഗ്യകരവുമായ ജീവിതപരിസരം ഒരുക്കുന്നതിൻ്റെ ഭാഗമായി, അബൂദബിയിലെ അൽ ഷംഖ മേഖലയിൽ 16 പുതിയ പൊതുപാർക്കുകൾ തുറന്നിരിക്കുകായണ്. മുനിസിപ്പാലിറ്റി ആന്റ് ട്രാൻസ്പോർട്ട് ഡിപ്പാർട്ട്മെന്റിനാണ് ചുമതല.
പുതിയ പാർക്കുകൾ കായിക വിനോദങ്ങൾക്കും വിശ്രമത്തിനും ഒരുപോലെ അനുയോജ്യമായ രീതിയിലാണ് രൂപകൽപ്പന ചെയ്തിരിക്കുന്നത്. കായികപ്രേമികൾക്കായി 25 സ്പോർട്സ് കോർട്ടുകൾ, 8 ഔട്ട്ഡോർ വ്യായാമ കേന്ദ്രങ്ങൾ, വിശാലമായ നടപ്പാതകൾ എന്നിവ ഒരുക്കിയിട്ടുണ്ട്. കുട്ടികൾക്കായി ആധുനിക സൗകര്യങ്ങളോടുകൂടിയ 25 കളിസ്ഥലങ്ങൾ പാർക്കുകളുടെ പ്രധാന ആകർഷണങ്ങളാണ്.
ഇതിനുപുറമെ, വിശ്രമത്തിനായി സൗകര്യപ്രദമായ ഇരിപ്പിടങ്ങൾ, മനോഹരമായി അലങ്കരിച്ച പൂന്തോട്ടങ്ങൾ എന്നിവയും പാർക്കുകളിൽ സജ്ജീകരിച്ചിട്ടുണ്ട്. എല്ലാ പ്രായവിഭാഗങ്ങളിലുമുള്ളവർക്കും ഒരുപോലെ പ്രയോജനപ്പെടുന്ന രീതിയിലാണ് ഈ പാർക്കുകളെല്ലാം രൂപകൽപ്പന ചെയ്തിരിക്കുന്നത്.
അൽ ഷംഖയ്ക്കു പുറമെ അൽ ഫലാഹ്, മുഹമ്മദ് ബിൻ സായിദ് സിറ്റി എന്നിവിടങ്ങളിലും സമാന രീതിയിൽ പൊതുസൗകര്യങ്ങൾ വർധിപ്പിക്കുന്ന പ്രവർത്തനങ്ങൾ പുരോഗമിക്കുകയാണെന്ന് അധികൃതർ വ്യക്തമാക്കി.
