ദുബൈ: ദുബൈ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് (GDRFA)യും വാടക തർക്ക പരിഹാര കേന്ദ്രവും (Rental Disputes Center) സേവനങ്ങളുടെ സംയോജനവും ജീവിത നിലവാരത്തിലെ മെച്ചപ്പെടുത്തലും ലക്ഷ്യമിട്ട് ധാരണാപത്രം ഒപ്പുവച്ചു. ഉപഭോക്തൃ സംതൃപ്തി വർദ്ധിപ്പിക്കുകയും ദുബൈയിയെ ലോകത്തിലെ ഏറ്റവും മികച്ചതും സന്തോഷകരവുമായ നഗരമായി മാറ്റുകയും ചെയ്യുന്നതാണ് സഹകരണത്തിന്റെ ലക്ഷ്യം.
ധാരണാപത്രം പ്രകാരം, ഉപഭോക്തൃ സേവനങ്ങളുടെ നിലവാരം ഉയർത്തുന്നതിനായി ഇരു സ്ഥാപനങ്ങളും തമ്മിൽ വിവര കൈമാറ്റം, സംയുക്ത പദ്ധതികളുടെ വികസനം, നവീന ആശയങ്ങളുടെ പങ്കിടൽ, സേവനങ്ങളുടെ ഏകീകരണം, പൊതുജനങ്ങൾക്ക് സേവനങ്ങളെക്കുറിച്ച് ബോധവൽക്കരണത്തിനുള്ള സംയുക്ത മാർക്കറ്റിങ് പ്രവർത്തനങ്ങൾ എന്നിവ നടത്തും.
“മനുഷ്യർക്ക് പ്രഥമ പരിഗണന” എന്ന തത്വത്തെ പ്രതിഫലിപ്പിക്കുന്നതാണ് ഈ കരാർ എന്ന് ജി.ഡി.ആർ.എഫ്.എ ദുബായ് മേധാവി ലഫ്. ജനറൽ മുഹമ്മദ് അഹ്മദ് അൽ മർറി പറഞ്ഞു. ഉപഭോക്തൃ സന്തോഷവും ജീവിത നിലവാരവും മുൻനിർത്തി പരസ്പരം ബന്ധിപ്പിക്കപ്പെട്ട, സുഗമമായ സേവനങ്ങൾ നൽകാൻ ഈ സഹകരണം സഹായകരമാകുമെന്ന് അദ്ദേഹം കൂട്ടിച്ചേർത്തു.
“സർക്കാർ സ്ഥാപനങ്ങൾ തമ്മിലുള്ള സഹകരണത്തിന്റെ തന്ത്രപരമായ ചുവടുവെയ്പ്പാണ് ഈ ധാരണാപത്രം. ഡാറ്റയും വൈദഗ്ധ്യവും പങ്കുവയ്ക്കുന്നത് ദുബൈയുടെ നീതിയോടും സുതാര്യതയോടും ഉള്ള പ്രതിബദ്ധതയെ ശക്തിപ്പെടുത്തുമെന്ന് വാടക തർക്ക കേന്ദ്രം ചീഫ് ജഡ്ജ് അബ്ദുൽ ഖാദർ മൂസ വ്യക്തമാക്കി.
ദുബൈയുടെ സമഗ്ര വികസന കാഴ്ചപ്പാടിനനുസൃതമായി ഡിജിറ്റൽ പരിഹാരങ്ങൾ പ്രയോജനപ്പെടുത്തിയും സേവന കാര്യക്ഷമത വർദ്ധിപ്പിച്ചും സാമ്പത്തിക-സാമൂഹിക വളർച്ചയെ പിന്തുണയ്ക്കുന്നതിൽ ഈ സഹകരണം നിർണായകമാകുമെന്ന് ജനറൽ ഡയറക്ടറേറ്റ് അറിയിച്ചു.
