ദുബൈ : യു.എ.ഇയിലെ സ്കൂളുകളിൽ വിദ്യാർത്ഥികളുടെ മൊബൈൽ ഫോൺ ഉപയോഗത്തിന് കർശന നിരോധനം ഏർപ്പെടുത്തി. പഠനത്തിൽ കൂടുതൽ ശ്രദ്ധ ഉറപ്പാക്കാനും ഡിജിറ്റൽ ഇടപെടലുകൾ മൂലമുള്ള ശ്രദ്ധക്കുറവ് ഒഴിവാക്കാനും ലക്ഷ്യമിട്ടാണ് നടപടി.
വിദ്യാഭ്യാസ മന്ത്രാലയത്തിൻ്റെ നിർദേശപ്രകാരം സ്കൂൾ ക്യാമ്പസുകളിൽ മൊബൈൽ ഫോൺ ഉപയോഗം അനുവദനീയമല്ല. നിയമം ലംഘിക്കുന്നവരിൽ നിന്ന് ഫോൺ പിടിച്ചെടുക്കും.
നിയമലംഘനം ആവർത്തിച്ചാൽ അധ്യയന വർഷം അവസാനിക്കുന്നതു വരെ ഫോൺ തിരികെ നൽകില്ലെന്നും അധികൃതർ മുന്നറിയിപ്പ് നൽകി.
സൈബർ ബുള്ളിയിങ് തടയാനും വിദ്യാർത്ഥികളുടെ മാനസികാരോഗ്യം സംരക്ഷിക്കാനുമാണ് ഈ തീരുമാനമെന്ന് വിദ്യാഭ്യാസ മന്ത്രാലയം വ്യക്തമാക്കി.
