ദുബൈ: ഡ്രൈവറില്ലാ (ഓട്ടോണമസ്) വാഹനങ്ങളുടെ ഉപയോഗം നിയന്ത്രിക്കുന്നതിനായി ദുബൈ റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) പുതിയ മാർഗനിർദേശങ്ങൾ പുറത്തിറക്കി. ഈ നിർദേശങ്ങൾ പ്രകാരം, ആറ് വിഭാഗങ്ങളിലായി വരുന്ന ഓട്ടോണമസ് വാഹനങ്ങൾക്ക് ലൈസൻസ് അനുവദിക്കുന്നതിനും പുതുക്കുന്നതിനുമായി എട്ട് നിർദ്ദിഷ്ട വ്യവസ്ഥകളാണ് ആർടിഎ പ്രഖ്യാപിച്ചിരിക്കുന്നത്.
എമിറേറ്റിൽ ഡ്രൈവറില്ലാ വാഹനങ്ങളുടെ പ്രവർത്തനം നിയന്ത്രിക്കുന്ന 2023-ലെ നിയമം നമ്പർ 9-നോട് പൂർണ്ണമായും അനുയോജ്യമായിട്ടാണ് പുതിയ മാർഗനിർദേശങ്ങൾ രൂപകൽപ്പന ചെയ്തിരിക്കുന്നതെന്ന് അധികൃതർ വ്യക്തമാക്കി.
യാത്രക്കാരെയും ചരക്കുകളും കൊണ്ടുപോകാൻ ഉപയോഗിക്കുന്ന വിവിധ തരത്തിലുള്ള ഡ്രൈവറില്ലാ വാഹനങ്ങൾക്കാണ് ഈ നിയമങ്ങൾ ബാധകമാകുന്നത്. ഇതിൽ, 13 സീറ്റുള്ള ലൈറ്റ് ഓട്ടോണമസ് വാഹനങ്ങൾ, ചരക്ക് കടത്തിനുള്ള ഹെവി വാഹനങ്ങൾ, 14 സീറ്റുള്ള ലൈറ്റ് ബസുകൾ, 26 സീറ്റുള്ള ഹെവി ബസുകൾ, ലൈറ്റ്, ഹെവി ഉപകരണങ്ങൾക്കായുള്ള വാഹനങ്ങൾ, കൂടാതെ സ്വയം നിയന്ത്രിത മോട്ടോർ സൈക്കിളുകൾ എന്നിവ ഉൾപ്പെടുന്നു.
ഡ്രൈവറില്ലാ ഗതാഗത സംവിധാനം സുരക്ഷിതവും കാര്യക്ഷമവും ആക്കുന്നതിന് ഈ മാർഗനിർദേശങ്ങൾ നിർണായകമാകുമെന്ന് ആർടിഎ വിലയിരുത്തുന്നു.
