അജ്മാൻ: ഇന്റർനാഷണൽ മാസ്റ്റേഴ്സ് ഫുട്ബോൾ അസോസിയേഷന്റെ (IMFA) ആഭിമുഖ്യത്തിൽ സംഘടിപ്പിച്ച IMFA ഓണം 2026, അജ്മാനിൽ വർണാഭമായ പരിപാടികളോടെ നടന്നു. “One Family, One Celebration, One Beautiful Onam” എന്ന സന്ദേശവുമായി സംഘടിപ്പിച്ച ആഘോഷത്തിൽ അസോസിയേഷൻ അംഗങ്ങളും കുടുംബാംഗങ്ങളും ഉൾപ്പെടെ നിരവധി പേർ പങ്കെടുത്തു. പൂക്കളം, ശിങ്കാരിമേളം, തിരുവാതിര, ഒപ്പന, ഗാന-നൃത്ത പരിപാടികൾ, കേരളീയ വേഷത്തിലുള്ള റാംപ് ഷോ, വിനോദ മത്സരങ്ങൾ എന്നിവ ആഘോഷത്തിന് മാറ്റുകൂട്ടി.
പ്രശസ്ത ഗായകൻ രഞ്ജിത്ത് ഉണ്ണിയും യൂസുഫ് ഭായും മുഖ്യാതിഥികളായി പങ്കെടുത്തു. കേരളത്തിന്റെ സാംസ്കാരിക പൈതൃകവും ഓണത്തിന്റെ പാരമ്പര്യവും വിളിച്ചോതിയ ആഘോഷത്തിൽ വിഭവസമൃദ്ധമായ ഓണസദ്യയുമുണ്ടായി.
IMFA വൈസ് പ്രസിഡന്റ് പ്രശാന്ത്, ജനറൽ സെക്രട്ടറി ഷാമിൽ, CFO ഷിജോ, സ്ട്രാറ്റജിക് പ്ലാനർ നാസർ, കൺവീനർ ഉത്തമൻ എന്നിവർ പരിപാടികൾക്ക് നേതൃത്വം നൽകി. ബോർഡ് ഓഫ് ഡയറക്ടേഴ്സ് അംഗങ്ങൾ, ലേഡീസ് വിങ്, സ്പോൺസർമാർ, അംഗങ്ങൾ എന്നിവരുടെ കൂട്ടായ സഹകരണമാണ് പരിപാടിയുടെ വിജയത്തിന് പിന്നിലെന്ന് സംഘാടകർ അറിയിച്ചു. ആഘോഷത്തിന്റെ വിജയത്തിനായി സഹകരിച്ച എല്ലാവർക്കും IMFA നന്ദി രേഖപ്പെടുത്തി.
