ദുബൈ: ഈ വർഷത്തെ ഏറ്റവും മനോഹരമായ ആകാശ വിസ്മയങ്ങളിലൊന്നായ ജൂണിലെ പൂർണ്ണചന്ദ്രൻ അഥവാ ‘സ്ട്രോബെറി മൂൺ’ ഇന്ന് രാത്രി ദൃശ്യമാകും. ജൂൺ 29 തിങ്കളാഴ്ച രാത്രിയോടെ ആകാശത്ത് ഉദിച്ചുയരുന്ന ചന്ദ്രൻ സാധാരണ ദിവസങ്ങളേക്കാൾ കൂടുതൽ വലിപ്പത്തിലും പ്രകാശത്തിലും നഗ്നനേത്രങ്ങളാൽ കാണാൻ സാധിക്കും. ഉത്തരാർദ്ധഗോളത്തിൽ വേനൽക്കാലം ആരംഭിക്കുന്നതിന് തൊട്ടുമുമ്പുള്ള അവസാന പൂർണ്ണചന്ദ്രനാണിത് എന്ന പ്രത്യേകതയും ഇതിനുണ്ട്.
പേര് സൂചിപ്പിക്കുന്നത് പോലെ ചന്ദ്രന് സ്ട്രോബെറിയുടെ ചുവപ്പോ പിങ്കോ നിറമായിരിക്കില്ല ഉണ്ടാവുക. വടക്കേ അമേരിക്കയിലെ തദ്ദേശീയ ഗോത്രവർഗ്ഗക്കാരുടെ ചരിത്രത്തിൽ നിന്നാണ് ഈ പേരിന്റെ ഉത്ഭവം. അവിടെ സ്ട്രോബെറി വിളവെടുക്കുന്ന ജൂൺ മാസത്തിലാണ് ഈ പൂർണ്ണചന്ദ്രൻ പ്രത്യക്ഷപ്പെടുന്നത് എന്നതിനാലാണ് ഇതിന് ‘സ്ട്രോബെറി മൂൺ’ എന്ന പേര് ലഭിച്ചത്.
തിങ്കളാഴ്ച സൂര്യാസ്തമയത്തിന് ശേഷം തന്നെ ആകാശത്ത് തിളക്കമുള്ള ചന്ദ്രനെ കാണാമെങ്കിലും, യുഎഇയിൽ ഇതിന്റെ പൂർണ്ണരൂപം ദൃശ്യമാകുക ജൂൺ 30 ന് പുലർച്ചെ 3:56-ഓടെ ആയിരിക്കും. ടെലിസ്കോപ്പോ മറ്റ് പ്രത്യേക ഉപകരണങ്ങളോ ഇല്ലാതെ തന്നെ ഈ പ്രതിഭാസം ആസ്വദിക്കാനാകും.
