ബിഷ്കെക്: ഷാങ്ഹായ് കോ-ഓപ്പറേഷൻ ഓർഗനൈസേഷൻ (SCO) ഉച്ചകോടിക്കിടെ ഇന്ത്യൻ പ്രധാനമന്ത്രി നരേന്ദ്ര മോദിയും ഇറാൻ പ്രസിഡന്റ് മസൂദ് പെസെഷ്കിയാനും തമ്മിൽ കൂടിക്കാഴ്ച നടത്തി. ഇന്ത്യ–ഇറാൻ ബന്ധം കൂടുതൽ ശക്തമാക്കുന്നതും വ്യാപാര സഹകരണം വിപുലീകരിക്കുന്നതും കൂടിക്കാഴ്ചയിൽ പ്രധാന ചർച്ചയായി.
ഇറാനുമായുള്ള ഇന്ത്യയുടെ ദീർഘകാല സൗഹൃദം വിവിധ മേഖലകളിൽ കൂടുതൽ ശക്തിപ്പെടുത്തുമെന്ന് മോദി വ്യക്തമാക്കി. ഇരു രാജ്യങ്ങളും തമ്മിലുള്ള വ്യാപാര മേഖല കൂടുതൽ വിപുലീകരിക്കുകയും വൈവിധ്യവത്കരിക്കുകയും ചെയ്യാനാണ് ഇന്ത്യ ആഗ്രഹിക്കുന്നതെന്നും മോദി പറഞ്ഞു.
പശ്ചിമേഷ്യയിലെ നിലവിലെ സംഘർഷ സാഹചര്യവും നേതാക്കൾ ചർച്ച ചെയ്തു. പ്രശ്നങ്ങൾക്ക് സംഭാഷണത്തിലൂടെയും നയതന്ത്രത്തിലൂടെയും പരിഹാരം കാണണമെന്ന ഇന്ത്യയുടെ നിലപാട് മോദി ആവർത്തിച്ചു. മേഖലയിൽ സമാധാനവും സ്ഥിരതയും ഉറപ്പാക്കാനുള്ള എല്ലാ ശ്രമങ്ങൾക്കും ഇന്ത്യ പിന്തുണ നൽകുമെന്നും അദ്ദേഹം വ്യക്തമാക്കി.
അതേസമയം, വാണിജ്യ കപ്പൽ ഗതാഗതത്തിന്റെയും സമുദ്രയാത്രാ സ്വാതന്ത്ര്യത്തിന്റെയും സുരക്ഷ ഉറപ്പാക്കേണ്ടതിന്റെ ആവശ്യകതയും മോദി ചൂണ്ടിക്കാട്ടി. സാധാരണക്കാരെയും സിവിലിയൻ അടിസ്ഥാനസൗകര്യങ്ങളെയും വാണിജ്യ കപ്പലുകളെയും കടൽയാത്രക്കാരെയും ലക്ഷ്യമിടരുതെന്നും ഇന്ത്യ വ്യക്തമാക്കി.ഇന്ത്യയും ഇറാനും BRICS, SCO തുടങ്ങിയ ബഹുരാഷ്ട്ര വേദികളിൽ സഹകരണം ശക്തമാക്കാനും ധാരണയായി. വരാനിരിക്കുന്ന BRICS ഉച്ചകോടിക്കായി പ്രസിഡന്റ് പെസെഷ്കിയാനെ ഇന്ത്യയിലേക്ക് ക്ഷണിക്കാനുള്ള താൽപര്യവും മോദി അറിയിച്ചു.
